9-9

تعالوا هنا (عند فاتيما - جمعة وبعدهالكوا؟)

انا ليه نازل بكرة؟

عشان مفيش خريطة طريق واضحة

عشان مبارك بقاله 5 شهور متنحى وما اتحاكمش

عشان المخلوع نايم ف مستشفى شرم الشيخ بينال رعاية خاصة وجايله طقم رعاية من المانيا ولا كأنه مذنب

عشان سوزان مبارك تعالج سنانها على نفقة الدولة, ومصابى الثورة يتلقحوا ف المستشفيات بال4 شهور لحد ما ماتوا

عشان جمال وعلاء ماحدش يعرف هما ف الحجز ولا لا

عشان حبيب العادلى لحد دلوقتى ماشفتوش بلبس الحجز ومعرفش محبوس ولا لا

عشان القناصة اللى معروفين بالاسم اللى كانوا فوق هيلتون رمسيس يصطادوا الناس لحد دلوقتى ماحدش حاسبهم

عشان امين الشرطة اللى قتل الناس والعسكرى اللى رقص بالسيف والظابط اللى شاور اشارات بذيئة للناس

عشان الحرامية اللى محكمة الجنايات طلعتهم براءة

عشان القضاة خدوا اجازة شهرين ولا كأننا فى حالة حرجة

عشان مبارك والعادلى ايدهم لسة ملوثة بدم الشهداء

عشان الشرطة مش فى خدمة الشعب

عشان كل ده

انا نازل بكرة التحرير ان شاء الله

براءة؟

براءة الفقي وغالي وفضلي والمغربي و5 سنوات لرشيد وإخلاء سبيل الشيخ

هى الناس دى بتستفزنا عشان ننزل؟

جمعة 8 يوليو

اضغط على الصورة

ثورة غضب أبناء مبارك

النهاردة

 24 يونيو

يوم الغضببب

غضب أبناء مبارك

كل اللى زعلانين على باباهم هاينزلوا مصطفى محمود

وكله بنفس واحد هايغنى لابوه ويقول:

وبحبك يا ريس

ولعلمك يا ريس

انا بزعل اوى لما

حد يقولك يا ريس

وكله هايزعق زى الغووووول

وينعر ويقوووووول

تعالالى يا بابا

وانا مالى هى

ودينى على طابا

وانا مالى هى

او شرم يا بابا

وانا مالى هى

يا حبيب الغلابة

وانا مالى هى

قلة ادب!

عن استفتاء 19 مارس

بعد الاستفتاء العالمى اللى حصل يوم 19 مارس واللى ماحدش يعرف بعد نتيجته اللى جت 77%-22% ايه اللى نتج ولا ايه اللى هايتغير

شفت بعينى حاجات كتير حصلت وعرفت من ناس اثق فيهم تماما حاجات كتير حصلت

ولما جيت افتح بقى لقيت اللى بيهاجمنى من قبل ما اكتب اى حاجة

هجوم شديد وشتايم مش مجرد نقد .. وانى حقود واننا عرفنا حجمنا واننا مش عارف ايه

هابقى اتكلم بعدين عن ثقافة الاختلاف اللى بجد ناقصانا .. بس اللى عايز اتكلم فيه دلوقتى .. هو ايه اللى حصل فعلا يومها

تزوير؟ .. مش هاقول حصل تزوير

لكن اللى حصل ماكانش استفتاء محكم 100% وماينفعش يتكرر بأى حال من الاحوال فى انتخابات مجلس الشعب او الانتخابات الرئاسية

الحبر الفوسفورى

انا مثلا والدتى ماحطتش صباعها فى الحبر الفوسفورى!

مش بقول انى اعرف ناس حصل معاها كذا .. لا ده والدتى انا نفسى حصل معاها ده .. وهى بنفسها شافت قدام عينيها كذا حد ماحطش صباعه فى الحبر الفوسفورى زيها .. ورجع وقف ف الطابور عشان يصوت تانى!!

 وانا داخل اصوت .. سالت الستات الغلابة اللى كانوا قاعدين مشرفات احط انهى صباع فى الحبر .. قالتلى اى حاجة المهم خلصنا بسرعة

وحطيت صباعى ومشيت .. من غير ما اوريها اذا كان عندى اى صباع تانى فيه حبر او لا!

يعنى انا كنت اقدر اروح اى لجنة تانية واخش اصوت تانى واحط اى صباع غيره .. وابقى اكرر ده 10 مرات .. او اكتر لو عرفت ف مرة ما احطش صباعى ف الحبر .. زى والدتى!

اشراف قضائى؟

قالك الاشراف القضائى على الاستفتاء كان بنسبة 100% ولا يشوبه شائبة

احنا اللجنة اللى صوتنا فيها كان فيها شاب صغير مستحمى ونضيف ولابس بدلة وواقف تحس ان لا حول له ولا قوة .. واقف شوية وف الشباك شوية وع الصندوق ده شوية .. وطبعا مش مركز لا مع الناس ولا مع كل الصناديق
وماتعرفش بقى ده مساعد وكيل نيابة ولا تحت التمرين ولا ايه بالظبط

اشراف أمنى؟

دى صورة الاشراف الامنى على اللجنة اللى انا صوتت فيها واللى كان فيها عشرات الالاف .. فى عين شمس قدام نقطة شرطة الزهراء بالظبط .. اللى الناس دى نفسها ولعت فيها قبل الاستفتاء ده بشهر ونص

ظابط وامين .. وشكرا

وقالك ممنوع التصوير .. امال الصور اللى انا مصورها جوة اللجنة دى صورتها ازاى؟

 

تيجى بقى تتكلم مع الاسلاميين او المتأسلمين وتقول الاستفتاء كان .. يقاطعك ويقولك اوعى تتكلم عن الاستفتاء وانتوا حاقدين والاستفتاء ده عرفكوا حجمكم الحقيقى وانتوا وانتوا

وهجوم شديد وكأنك بقيت كافر

وكأن الاستفتاء ده كان استفتاء على الاسلام .. ومن قال نعم فقد قال نعم لله وللدين, ومن قال لا فقد قال لاااااا لله وللدييييييين

بركاتك يابو يعقوب يا مهزراتى

اقرا ايضا: غزوة الزناديق

5 June 2011

غناها عزيز الشافعى ورامى جمال

وكتبها ولحنها عزيز الشافعى .. من توزيع وسام عبد المنعم

مقطع (يا بلادى يا بلادى .. انا بحبك يا بلادى) للموسيقار التاريخى بليغ حمدى

"كان لحنه الموسيقار بليغ حمدى من 40 سنة عقب مذبحة مدرسة بحر البقر"

Song by Aziz Shafei and Ramy Gamal

Written and composed by Aziz Shafei .. and arranged by Wesam Abdel-Moniem

"Oh My Country, Oh My Country .. I love you, My Country" part by historical musician Baligh Hamdy

"He made it 40 years ago after Bahr el-Baqar incident"

انا بحبك يا بلادى

Oh My Country, Oh My Country .. I love you, My Country

Tell my mother not to grieve .. and for my sake not to cry
Tell my mother that I'm sorry .. I'll die again and again, for Our Country to live
Promise me to kiss her hands for me .. and give greetings to My Country

Oh My Country, Oh My Country .. I love you, My Country

In my body there's fire, bullets, and iron .. your flag is in my hand, and my name is Martyr
I bid farewell to life and I see you .. Oh, Egypt, beautiful in a new dress
Until my last breath .. I'll die loving to my country

Oh My Country, Oh My Country .. I love you, My Country

Angels flying around me .. our separation moment, my love, it was different
I'll go with them and leave you .. and I hope to see your face, Egypt, again
They - Angels - told me: "let's go to Paradise" .. I told them: "Paradise is My Country!"

Oh My Country, Oh My Country .. I love you, My Country






يا بلادى يا بلادى .. انا بحبك يا بلادى

قولوا لامى ماتزعليش .. وحياتى عندك ماتعيطيش
قولولها معلش يا امى .. اموت اموت وبلدنا تعيش
امانة تبوسولى ايديها .. وتسلمولى على بلادى

ف جسمى نار ورصاص وحديد .. علمك ف ايدى واسمى شهيد
بودع الدنيا وشايفك .. يا مصر حلوة ولابسة جديد
لاخر نفس فيا بنادى .. بموت وانا بحب بلادى

طايرين ملايكة حواليا طير .. لحظة فراقك يا حبيبتى غير
هامشى معاهم وهاسيبك .. واشوف يا مصر وشك بخير
قالولى يلا ع الجنة .. قلتلهم الجنة بلادى

------------------------------------------ 
 

بطل النكسة

ثورة اونطا.. هاتوا شهداءنا

ثورة اونطا.. هاتوا شهداءنا

 

 

القتيل التالت للداخلية.. والحسابة بتحسب.. والله نستاهل اي حاجة تحصل لنا لو سكتنا

تحديث:
البديل ترصد 5 حالات تعذيب في 14 يوم... دي ما كانتش بتحصل ايام المخلوع
يا احنا يا هم في البلد دي
--------------
اضغط على البانر عشان يطلع لك الايفينت.. ووزعه، وحنطبعه ونوزعه في الاحياء الشعبية

عشان ان كنت ناسي افكرك.. افكر الطبقة المتوسطة اللي تواطأت مع الداخلية في التسعينيات على التعذيب وما ابتدتش تتكلم الا لما المسعور اندار عليها

احنا عايزين الغلابة...

شاهد الفيتيون:

Posted by جبهة التهييس الشعبية at 19:39

من مدونة نوارة نجم

 

27 مايو

ثورة .. ثورة

سبعة تواريخ شكلت انتفاضة 25 يناير - (7) "الرحيل " 11 فبراير

18 يوما استمرت انتفاضة 25 يناير
ولكن 7 ايام بعينها هى التى يمكن للتاريخ ان يلخص فيها احداث تلك الانتفاضة


===================================

7) 11 فبراير .. الرحيل (جمعة الصمود .. خطاب التنحى):

قدر عظم الاحباط .. كان عظم الفرحة والنشوة بعد اقل من 24 ساعة فقط
شعر المتظاهرون بالاحباط والغضب نتيجة خطابا لرئيس, واتجهت مجموعات بالفعل لتحاصر قصر الرئاسة, وتناثرت بعض الاخبار عن هروب مبارك الى شرم الشيخ, وعن استقالة حسام بدراوى من الحزب الوطنى الديمقراطى
وفى حوالى السادسة مساءا .. كان خطاب عمر سليمان الذى اعلن فيه تنحى الرئيس السابق محمد حسنى مبارك عن منصبه وتسليمه الحكم للقوات المسلحة
وكان الخبر مذهلا ومبهجا للمتظاهرين الذين لم يكونوا ليتوقعوا هذا الخبر بعد ساعات قليلة من الخطاب الثالث الذى اعلن فيه الرئيس السابق تحديه لارادة الناس واستفزازه لهم
ترتب على قرار الرئيس السابق بالتنحى تكليف القوات المسلحة بالحكم واعلان حل البرلمان وتعليق العمل بالدستور

سبعة تواريخ شكلت انتفاضة 25 يناير - (6) "الخطاب الثالث" 10 فبراير

18 يوما استمرت انتفاضة 25 يناير
ولكن 7 ايام بعينها هى التى يمكن للتاريخ ان يلخص فيها احداث تلك الانتفاضة


===================================

6) 10 فبراير .. الخطاب الثالث:

جاء الخميس 10 فبراير بعد يومين ساخنين شهدوا محاصرة المتظاهرين لمجلس الشعب واضراب العمال وحدوث انفجار فى خطوط  انابيب امداد الغاز لاسرائيل والاردن وسوريا
فى الوقت الذى يستمر فيه مبارك فى استفزاز الشعب وممارسة مهامه الرئاسية واجتماعه مع حدة وزراء ومحافظين, وتصريح نائبه عمر سليمان بان مثر غير جاهزة للديمقراطية بعد, وتصريح مبارك نفسه برغبته فى الرحيل ولكنه يخاف على مصر من الفوضى!
واستمر المتظاهرون فى تظاهرهم السلمى واستمرت عزيمتهم فى الصعود ومثابرتهم نحو تحقيق مأربهم وعدم انخداعهم بتصريحات الرئيس فى خطابيه السابقين
ومع استمرار التظاهرات, اجتمع مبارك بنائبه عمر سليمان ورئيس الوزراء احمد شفيق .. واخبر الجيش المتظاهرين فى التحرير بان هناك خبرا هاما سيتم اعلانه وان يتابعوا الاخبار عبر التلفاز
وتوقع الجميع بانها نهاية حكم مبارك, وبانه سيظهر على الشاشة ليعلن تنحيه عن رئاسة الجمهورية
وانتظر الناس كثيرا, ومرت ساعات طوال ولم يظهر فيها الرئيس .. حتى إذيع تسجيلا له فى الثانية مساءا تقريبا يعلن فيه انه لن يتنحى وانه سيكمل ولايته لنهايتها!, وانه طلب تعديل الدستور, وسوف يوكل لنائبه عمر سليمان بعض المهام, ويطلب فيه مجلس الشعب بالنظر فى الطعون الموجهة لاعضاءه (400 طعن فى 444 دائرة!) وتجاهل قانون الطوارئ واقرار الاشراف القضائى على الانتخابات
كما قال ان التظاهرات الشبابية التى بدات رائعة باتت مخربة ومدمرة, وان هناك قوى سياسية هى التى تتحكم فى الشباب وقود المظاهرات!
كان خطابه مستفزا للغاية للمتظاهرين الذين كانوا قد هيأوا أنفسهم للاحتفال عقب خطاب تنحيه المتوقع
فكان احباطهم حينها عظيما

سبعة تواريخ شكلت انتفاضة 25 يناير - (5) "جمعة الرحيل" 4 فبراير

18 يوما استمرت انتفاضة 25 يناير
ولكن 7 ايام بعينها هى التى يمكن للتاريخ ان يلخص فيها احداث تلك الانتفاضة


===================================

5) 4 فبراير .. جمعة الرحيل:

الجمعة الثانية .. ومليونية جديدة
كان الجميع يتوقع بان الملايين الثلاثة التى احتشدت فى التحرير يوم الاول من فبراير لن تجتمع مرة اخرى خاصة بعد يومين دمويين فى التحرير
ولكن المتظاهرون أبوا إلا أن يذهلوا الجميع .. واكثر من ثلاثة ملايين جديدة تحتشد فى ذلك اليوم فى التحرير من الصباح الباكر وحتى المساء والاحتفال بكسر حظر التجول
فبعد ان اعتقد النظام انه بالهجوم على من فى التحرير يثير الخوف من التظاهر, وجد ان هناك من لم يشارك فى المظاهرات من قبل استفزه ما يحدث فى التحرير وذهب ليتظاهر عندا فى النظام وكسرا لحاجز الخوف
كانت الجمعة الثانية فى الثورة هى جمعة كسر حاجز الخوف الى الابد
ترتب على ذلك اليوم استقالة جماعية من اعضاء هيئة المكتب السياسى للحزب الوطنى الديمقراطى وحلول حسام بدراوى بديلا لصفوت الشريف وجمال مبارك فى الامانة العامة وامانة السياسات للحزب

سبعة تواريخ شكلت انتفاضة 25 يناير - (4) "موقعة الجحش" 2 فبراير

18 يوما استمرت انتفاضة 25 يناير
ولكن 7 ايام بعينها هى التى يمكن للتاريخ ان يلخص فيها احداث تلك الانتفاضة


===================================

4) 2 فبراير .. موقعة الجحش:

كان هذا اليوم هو اليوم الفاصل
فبعد ليلة واحدة من خطاب الرئيس يتم اتخاذ القرار الغبى باستخدام العنف ضد المتظاهرين فى التحرير لتخويفهم
ففى الوقت الذى استمرت فيه المظاهرات فى التحرير بعد الخطاب الثانى للرئيس .. وبدا البعض يتظاهر فى ميدان مصطفى محمود مؤيدا للرئيس وقتها
فوجئ الجميع باقتحام ميدان التحرير بواسطة بعض الجمال والاحصنة يقودها بلطجية مسلحين هاجموا المتظاهرين فى التحرير بالاسلحة من عصى وكرابيج وطوب وزجاجات مولوتوف وغيرها, وبتوجه جماعات المتظاهرين بمصطفى محمود الى التحرير محاولا التعدى على المؤيدين للنظام, كما بدات موجة من الهجوم على الاجانب والتشكيك فيهم
كثرت بعد ذلك الاسماء التى تم الزج بها ضمن قائمة ممن اشتركوا فى هذا المخطط الغبى بدءا من جمال مبارك (والذى ذكرت بعض التقارير فى الصحف باقتراحه اطلاق بعض الحيوانات المفترسة من حديقة الحيوان على المتظاهرين!) ومرورا بصفوت الشريف وزكريا عزمى وحتى ماجد الشربينى وابراهيم كامل ومحمد ابو العينين ورجب هلال حميدة وحسن عبد الرحمن
حتى الان لا يعلم احد من المسئول الفعلى عن مهزلة موقعة الجحش .. ولكن المتورطين كثر
خاصة ان الهجوم على المتظاهرين فى التحرير لم يتوقف بل زاد فى اليوم التالى بقناصة على اسطح بعض الفنادق والتى ترصدت المتظاهرين والهجوم بالاعيرة النارية الذى حدث على المتظاهرين فى ذلك اليوم الذى شهد استنكارا عالميا لما يحدث فى التحرير

سبعة تواريخ شكلت انتفاضة 25 يناير - (3) "المليونية الاولى" 1 فبراير

18 يوما استمرت انتفاضة 25 يناير

ولكن 7 ايام بعينها هى التى يمكن للتاريخ ان يلخص فيها احداث تلك الانتفاضة

===================================

3) 1 فبراير .. المليونية الاولى:

ثلاثة ايام اخرى من الغضب فى الشارع المصرى
ففى الوقت الذى شعر فيه البعض بالنصر لمجرد ظهور الرئيس وخطابه واعلانه اسقاط الحكومة وتعيين نائبا للرئيس, كانت الغالبية العظمى فى ميدان التحرير لا تزال متعطشة للمزيد, وتم الدعوى الى مظاهرة مليونية فى ميدان التحرير تجمع متظاهرى القاهرة والاسكندرية والسويس والمحلة وباقى المحافظات الثائرة, والتى تم الاقتراح ان يتظاهر الجميع معا فى ميدان التحرير ليتعاظم العدد ويصبح قوة ضغط اكبر على النظام
وبالفعل تجمهور ثلاثة ملايين فى ميدان التحرير يومها فى نفس الوقت الذى استمر فيه متظاهرى المدن والمحافظات الاخرى فى التظاهر فى مدنهم
كان كل من لم يتظاهر فى الخامس والعشرين او الثامن والعشرين قد زال الخوف عنه ونزل بالفعل الى التحرير فى الاول من فبراير إثر دعوى المليونية
وبنهاية يوم الثلاثاء اول فبراير, كان الخطاب الثانى للرئيس, والذى اعلن فيه عدم ترشحه لفترة رئاسية جديدة فى انتخابات سبتمبر 2011 وانه سيكمل ولايته الحالية والاخيرة حتى اكتوبر 2011 وانه سيقوم باجراء عدة تعديلات على الدستور خاصة بالغاء قانون الطوارئ وتحديد فترات تولى الرئاسة

سبعة تواريخ شكلت انتفاضة 25 يناير - (2) "جمعة الغضب" 28 يناير

18 يوما استمرت انتفاضة 25 يناير

ولكن 7 ايام بعينها هى التى يمكن للتاريخ ان يلخص فيها احداث تلك الانتفاضة

===================================

2) 28-01 .. جمعة الغضب:

اربعة ايام متتالية استمر فيها اعتصام اهل التحرير بلا كلل ولا ملل
واستمر انقطاع خدمات الانترنت والهواتف المحمولة
وايضا استمر فيها وقوف رجال الشرطة فى تحفز واستعداد للانقضاض
كان الجنود قد بدأوا فى الانهيار تعبا وجوعا وعطشا
وكانت الجماهير فى ازدياد يوما بعد يوم, وكانت اول جمعة
وكانت الجمعة التى دعى فيها الجميع للتظاهر بمجرد انتهاء صلاة الجمعة
وبمجرد فراغ المصلين من صلاتهم, اندفعت الجموع من اغلب مساجد القاهرة ومدن مصر الكبرى كالاسكندرية والسويس والمنصورة والمحلة
فى القاهرة . كان الكل فى طريقه للتحرير
وكان الكل يتظاهر .. سلميا
كان منظر المتظاهرين فى غاية الرقى وهم يمرون يجوار حاجز من جنود الشرطة يسدون به الطريق نحو الاماكن الحساسة
كما رأيت بعينى فى العباسية .. من عشرات الالاف من المتظاهرين الذين مروا بجوار حاجز صنعه عشرات الجنود ليمنعوا مرور اى متظاهر نحو وزارة الدفاع ولكن بشكل يسمح بالعبور نحو التحرير مرورا بكوبرى العباسية - غمرة - رمسيس
إذا أخذ المتظاهرون - وهم سائرون فى طريقهم نحو التحرير - يصفقون لرجال الشرطة هاتفين بشكل جماعى ومشيرين نحو رجال الشرطة" "رجالة .. رجالة"
بل وتقدم بعضهم نحو رجال الشرطة مقدمين لهم زجاجات المياه للجنود وصافحوا بعض الضباط ثم يواصلوا طريقهم نحو التحرير
كان مشهدا اكثر من حضارى وأكثر من سلمى
وانتهى بهجوم عدد من رجال الشرطة على المتظاهرين السلميين بداعى احتكاك بعض المتظاهرين بهم
والذين تم اكتشاف - لاحقا - انهم من رجال الحزب الوطنى والذين اندسوا بين المتظاهرين واحتكوا بالشرطة
وكان المشهد الدامى الاول
ففى الوقت الذى انهمرت فيه المياه التى اطلقها رجال الشرطة على المصلين فى الاسكندرية, والذين وقفوا وركعوا وسجدوا والمياه تندفق عليهم .. كان رجال شرطة القاهرة يطلقون النيران على المتظاهرين بشكل عشوائى والعشرات يسقطون ما بين قتلى ومصابين فى يوم خلده تاريخ مصر بانه يوم شهداء ثورة يناير
كان يوم مأسوى
ففى الوقت الذى انسحب - او هرب - فيه رجال الشرطة بشكل مريب وفى وقت واحد من كل اقسام الشرطة والتى اندلعت فيها النيران كلها فى نفس الوقت, وحدثت الهجمات على سجون رجال مصر - وسجون الرجال فقط لا النساء - وحدث الهجوم الموحد من البلطجية على شوارع مصر والمتحف الوطنى وكثر الحديث عن مؤامرة من الداخلية المصرية التى قايضت أمن الشعب بحريته, وتشكلت اللجان الشعبية فى الشوارع لحماية المنازل والمحلات .. نزل رجال الجيش للمرة الاولى للشوارع المصرية وسارت الدبابات المصرية فى الشوارع فى مشهد لم يره شباب المصريين من قبل عقب اعلان الحاكم العسكرى حظر التجول بدءا من السادسة مساءا, أى بعد 20 دقيقة فقط من الاعلان الذى كان فى السادسة إلا ثلث!
واخيرا .. ومع انتصاف الليل .. خرج الرئيس المصرى - السابق - محمد حسنى مبارك على الشعب المصرى ملقيا خطابه الاول بعد مرور 4 ايام كاملة على اندلاع الثورة
4 ايام تجاهلت فيها القيادة السياسية فى مصر الاحداث وانتظرت قمع الداخلية للمتظاهرين, وعندما فشلت الداخلية فى تحقيق ما اعتادت عليه بعد مواجهة الغضب المصرى الناتج عن كبت السنين .. ظهر الرئيس المصرى السابق بعد اربعة ايام كاملة معلنا عزمه على تغيير الحكومة وتعيين نائبا للرئيس (فى أول انتصار ملموس للثورة)

سبعة تواريخ شكلت انتفاضة 25 يناير - (1) "الانطلاقة" 25 يناير

18 يوما استمرت انتفاضة 25 يناير

ولكن 7 ايام بعينها هى التى يمكن للتاريخ ان يلخص فيها احداث تلك الانتفاضة

===================================

1) 25-01 .. الانطلاقة:


لم يكن احد ليتوقع ان يتظاهر 60 الف مصرى يوم عيد الشرطة
كانت الدعوات للتظاهر قد انتشرت عبر الفيسبوك وتويتر والمدونات من قبل ذلك التاريخ بفترة .. وكان الكل يدعو من يقرا رسالته ان ينشر هذه الدعوة وان يخبر الجميع ممن لا يستخدم الانترنت حتى لا تكون مجرد ثورة من شباب الفيسبوك .. وانما لتكون ثورة شعبية كاملة, بدأها ونشرها شباب الفيسبوك, ونفذها الشعب المصرى بأسره
وكانت الدعاوى عبر الانترنت بكتابة وريقات تحوى فكرة الثورة يوم عيد الشرطة, وكان هناك من اقترح ان يخرج الشباب فى مجموعات ويقف كل منهما عند تجمع من الناس ليخبرهم بأن هناك ثورة
اثناء هذه الفترة كانت الحكومة تسخر من تلك الدعاوى, وهناك من قال "دعهم يمرحون"
وخرج عدد ليس بقليل يوم 25 يناير .. 60 الف مصرى امام دار القضاء العالى يقودهم شباب حركات 6 ابريل وكلنا خالد سعيد والجمعية الوطنية للتغير وكفاية
عدد ليس بالهين مقارنة باشباه المظاهرات التى كانت تحدث طيلة الاعوام الثلاثين المباركية
وخرج رجال الشرطة
وخرج الامن المركزى .. وبدا عنف الامن المركزى, واستعمال قنابل مسيلة للدموع منتهية الصلاحية والرصاص الكاوتشوكى وخراطيم المياه والعصى وغيرها
وبدا الاعتصام فى ميدان التحرير
وكلما مر الوقت كان عدد اهل التحرير فى ازدياد .. وكان رجال الشرطة يزدادون ارهاقا وقلقا فوق ارهاقهم وقلقهم
حتى انتصف الليل, وادركت الداخلية ان اهل التحرير لن يرحلوا!

اليوم السابع - إسلام الحضرى يكتب: ليه 27 مايو

إسلام الحضرى يكتب: ليه 27 مايو

 

 

ليه نازلين تانى
ليه عايزين نفكر الناس إن الثورة ما بتخلصش
لما نزلنا يوم 25 يناير مكناش نازلين علشان حسنى مبارك يمشى
ولا علشان نتحول من دولة بيحكمها حسنى مبارك لدولة بيحكمها المجلس العسكرى.

ولا علشان حتى يحكمنا أحسن واحد فى الدنيا
إحنا نزلنا يوم 25 يناير رافعين شعار عيش حرية كرامة
عيش
حرية
كرامة

3 كلمات بس هما كل حاجة ممكن يحتاجها كل حد، مهما كان مستواه ومهما كان تعليمه ومهما كان تفكيره.

منزلناش يوم 25 يناير علشان بس يكون عندنا شهداء نعلق صورهم ونقول شهداء 25 يناير، وندمع واحنا بنتفرج على ظابط الجيش بيأدى التحية العسكرية ليهم.
منزلناش علشان يتشال اسم مبارك من محطة مترو، وتتسمى بأسامى ناس، منزلتش غير علشان
عيش
حرية
كرامة

منزلناش علشان يكون مصابو الثورة مرميين فى المستشفيات الحكومية بدون علاج، وحسنى مبارك فى مستشفى شرم الشيخ،
منزلناش علشان سوزان مبارك تشترى حريتها بكام جنيه،
منزلناش علشان فتحى سور يأخد براءة من سرقة فلوسنا،
منزلناش علشان حبيب العادلى اللى قتل الناس فى الشوارع، اللى عذب اخواتنا فى سجونه، واللى نشر الإرهاب فى مصر، اللى فجر كنيسة القديسين اللى فجر فنادق شرم الشيخ يتحاكم بتهمة غسل أموال.

منزلناش علشان ظباط الشرطة اللى قتلوا أخويا وأخوك الداخلية تجيبلهم محام يدافع عنهم بـ 100000 جنيه، من فلوسنا.

منزلناش علشان مديرى الأمن اللى أمروا بضربنا بالرصاص يتنقلوا من محافظة لمحافظة.
منزلناش علشان نسيب كنيسة إمبابة تتحرق، علشان نحمى العلم الإسرائيلى.

منزلناش علشان يبقى عندنا أفلام وأغانى باسم الثورة، ومنزلناش علشان يتغير اسم أمن الدولة للأمن الوطنى، ويشتغل نفس الظباط نفس الشغل، ومنزلناش علشان زكريا عزمى يشترى حريته بملاليم.

نزلنا علشان عيش حرية كرامة
نازلين تانى يوم 27 مايو علشان
عيش
حرية
كرامة

 

 

هل احنا كدة مبسوطين؟

بعد مرور حوالى 3 شهور على رحيل المخلوع

و100 يوم على جمعة الغضب ثانى جمعة فى الثورة

هل احنا حققنا اللى احنا عملنا الثورة عشانه؟

هل احنا كنا نتمنى واحنا ف التحرير, انه لما ييجى النهاردة يكون كدة؟

انا عن نفسى .. محبط جدا!

الجمعة 1 ابريل

شهرين والثورة لسة شغالة

 النهاردة 25 مارس

زى النهاردة من شهرين بدات الثورة

وغلطان اللى يتخيل انها خلصت يوم 11 فبراير

الثورة لسة شغالة .. وهاتفضل شغالة لحد ما البلد تتطهر تماما وتتنقل النقلة اللى الثوار الحقيقيين كانوا عايزينها

عايز اكتب عن حاجات كتير بخصوص الثورة

الاجندات الخارجية, والكنتاكى, وحقيقة وائل غنيم, وموقعة الجمل, و..... حاجات كتير

بس عايز اقول .. ان الثورة لسة ما خلصتش

والمفروض كلنا نشتغل عشان ده

كلم اى شركة لتداول الاوراق المالية وافتح حساب فى البورصة ولو ب100 جنيه .. ارشحلك شركة جذور

كلم اى حزب انت مقتنع برايه واسال عن خطوات الانضمام للحزب ده

خش ويكيبيديا واعمل سيرش على اى مصطلح سياسى ممكن ماتكونش فاهمه واتنقل من لينك للينك .. خصص لنفسك ساعة واحدة بس ف اليوم لده

خش جوجل واعمل سيرش على اسم مرشح من المرشحين للانتخابات الرئاسية الجاية ودور على اراء عنه واقرا اللى بيهاجمه واللى بيأيده واتفرج على اشهر فيديوهات ليه ع اليوتيوب .. خصص ولو يوم واحد لكل مرشح ولو نص ساعة ف اليوم

بكرة (وكل سبت) فى اجتماع للاعضاء الجدد فى حركة 6 ابريل كلمهم واسال وروح وخد فكرة

العنوان: 28 ش ال 7 السواقي متفرع من ش القصر العيني امام مسرح فيصل ندا

0102864919 - 0107130762 - 0105805657 - 0196458521 - 0100744666

وخش املا الفورم دى

خش اقرا الدستور قبل التعديلات الاخيرة
وخش هنا يمكن تعرف معلومة: لازم تعرف و اشرح
بص على: مش هنقضيها فيس بوك و تويتر و هننزل الشارع نوعي الناس و قعدتك على الفايس بوك مش هتغير مصر

وبس كدة مؤقتا

He stepped down - اتنحى

زى النهاردة - وزى دلوقتى - من شهر بالظبط
11-2-11


اتنحى الرئيس المخلوع محمد حسنى مبارك




كانت تقريبا احلى ساعة فى حياتى .. من ستة لسبعة بالليل .. 11 فبراير 2011
مهما وصفت اللى حصل فيها مش هعرف
ما بين جرى وصريخ وعياط وسجود وفاتحة وغنا وزغاريد واغانى
...كان يوم قوى جدا
يارب يكون بفايدة ف الاخر
كنت قاعد ف خيمة بتكلم مع ناس اجانب

 محبطين ومخنوقين وفاقدين الامل بعد ساعات من خطابه الاخير يوم الخميس 10-2-2011

وفجاة سمعنا صريخ وصويت جامد برة

انا حسيت بصراحة .. طلعنا جرى لبست حاجة ف رجلى وجريت بسرعة سالت راجل بيجرى ايه اللى حصل؟

ماردش .. كان بيجرى وعمال يقول "ععععععاااااااااااااااااااا"

سالت واحدة تانى .. قال "ععععععاااااااااااااااااااا"

واحد وقف وقاللى "اتنحى اتنحى!!!!"

قعدت انط واجرى ف مكانى والف حوالين نفسى وانا بصرخ

كلمت بابا بسرعة اتاكد منه

ولمنا رد عليه ف التليفون وماقالش سلام عليكم ولقيته بيقول "الف مبروك يا حبيبى"

عرفت انه فعلا

ماعرفتش اقول ايه ومسكت نفسى بالعافية وقفلت معاه

بدات اصرخ .. ولما واحد سالنى فى ايه

قلتله: "ععععععاااااااااااااااااااا"

طلعت اجرى والتحمت بالناس

قلبى كان هايقف من كتر التنطيط والصريخ والجرى

عملنا دواير وقعدنا نلف واحنا بنتنطط وحاطين ايدينا على كتاف بعض (وماحدش فينا يعرف التانى) وكل واحد بيقول اللى قار يقوله

الشعب خلاص اسقط النظام .. بلادى بلادى .. والله وعملوها الرجالة .. او اى هتاف

هو انا مش هعرف اوصف بالظبط لانى استحالة افتكر اللى حصل بالظبط ساعتها

بس كان فى صريخ كتير .. وسجود شكر كتير

وطلعت اجرى على النصب التذكارى اللى كنا عاملينه للشهداء واللى حاطين فيه صورهم ف براويز وحواليهم سور صغير

وقفت اقرالهم الفاتحة

كنت خلاص فعلا منهار

واللى يقولى خلاص من النهاردة مفيش عياط وهانضحك على طول .. واللى تزغرد .. واللى الاقيه قعد يعيط معايا

ورجالة ما استحملوش وقعدوا ف الارض وتجمعات بالالاف عمالين يقولوا كل الهتافات اللى كنا بنهتف بيها من اول يوم ف الثورة

كانت لحظة تاريخية

وبدا اغلب الناس اللى كانوا مشيوا او روحوا بيوتهم ساعتها من بعد الخطاب بداوا يرجعوا

واللى كان برة التحرير على قهوة ولا بياكل رجع

وف دقايق التحرير اتملى

اللى ماكانش موجود ف التحرير اليوم ده بالذات .. فاته كتير اوى
كتير اوى بجد

كان يوم مش عادى

كانت ساعة مش عادية

من ستة لسبعة بالليل .. 11 فبراير 2011

عمرى ما هاعيش لحظة تانية زى دى

عمرى ما هانسى التاريخ ده

(+

بقالى كام يوم عايز اعمل بوست جديد اتكلم فيه عن موضوع تانى

بس عشان الاحداث الحالية فى مصر فانا مصمم انى اسيب اخر بوست زى ما هو بتاع المسلمين والمسيحيين .. الحقيقيين

Since couple of days ago I was thinking about making a new post.
but due to current situation and what's happening now in Egypt I insist on keeping my latest post as it is which I was talking about Egyptian Muslims and Christians .. real ones

ربنا يحفظ مصر

God bless Egypt

Tahrir Muslims and Christians - مسلمى ومسيحيى التحرير

كان كله واحد
مسلمين ومسيحيين
ماكانش فى فرق بين حد

Everyone was united.
Muslims and Christians.
There was no difference between one and the other.

18 يوم استمرت الثورة .. من غير ما نسمع عن حالة تفجير واحدة عند اى كنيسة او حالة تعدى واحدة من مسيحى على مسلمين
بدون اى محاولة من اى جانب لانه يأذى التانى
لما المسلمين كانوا بيصلوا كان المسيحيين هام اللى بيحموهم, ولما المسيحيين عملوا قداس كان المسلمين هما اللى بيحموهم
كانوا مش فئتين (مسلمين ومسيحيين), كانوا فئة واحدة .. مصريين

Revolution lasted for 18 days .. without hearing about any Muslim attacking a church, or any Christian insulting Muslims.
without anyone attempt to hurt the other one.
when Muslims were praying they were protected by Christians, and when Christians were praying they were protected by Muslims.
They weren't two categories (Muslims/Christians) .. They were one category .. Egyptians.

المصريين طول عمرهم اخوات
المسلم والمسيحى شربوا من نفس النيل واتعذبوا ف نفس القسم وكانوا مع بعض ف نفس الفريق اللى صعد لكاس العالم

Since time immemorial, Egyptians are brothers.
Muslims and Christians drank from the same Nile, have been tortured at the same police station, and they were at the same national team which went to the football
world cup!

فى التحرير .. الاخوان المسلمين كانوا بيقعدوا جنب المسيحيين
كانوا بيتكلموا ف نفس الموضوع
مؤيدين لبعض ومتفقين ان النظام لازم يمشى .. مش معارضين لبعض وكل واحد عايز جبهته هى اللى تحكم!

At Tahrir, Muslims Brotherhood people were sitting beside Christians
They were talking about the same topic
They backed each others opinion .. they weren't opposites, and either side didn't wanted his own side to rule or govern!

كمثال .. فى التحرير كنت بتكلم مع شاهدة عيان أكدتلى ان جيهان فاضل - ممثلة مسيحية - كانت فى لقاء تليفزيونى
وقالت ان ماعندهاش اعتراض على ان الاخوان يكونوا مسئولين طالما هايحكموا بالعدل ومش هايفرقوا بين المسلمين والمسيحيين
وان هما نفسهم ممكن برضه مايكونش عندهم اعتراض ان مسيحى يكون مسئول طالما هايحكم بالعدل ومش هايفرق بين مسيحى ومسلم
لكن هل كان الاخوان لامسلمين فعلا متواجدين بنية الوصول للحكم؟

As an example, an eye witness told me personally while we were talking that Jihan Fadel - a Christian actress - participated in a TV interview at Tahrir
she said that she had no objections to the Muslin Brotherhood takes power as long as they will be fair, and will make no difference between Muslims and Christians
and they will also have no objections on any Christian wants to govern as long as he will be fair and make no difference between Christians and Muslims

 كان كل اللى برة التحرير متخوف وبيقولك ان الاخوان ماليين التحرير وعمالين يحرضوا الناس عشان يحققوا اهدافهم وانهم هدفهم يوصلوا للحكم وبيستغلوا الشباب والناس اللى ف التحرير عشان كدة
اه الاخوان كانوا موجوديبن .. لكن برضه المسيحيين كانوا موجودين .. والاحزاب كانوا موجودين .. واصحاب الفكر الحر كانوا موجودين
كان فى ورق كتير بيتوزع . ما بين نشرات صحية ونشرات توعية اننا لازم نكون احسن ولازم نصلح نفسنا عشان مصر ولازم نفهم الوضع الحالى عامل ازاى
لكن ماكانش فى نشرة بتقول ان الاسلام هو الحل ولا بتقول الاخوان دول حلوين ولا بتسرد مزاياهم ولا انهم هم الحق
كان من حق الاخوان انهم يكونوا موجودين ف التحرير زيهم زى اى مواطن مصرى عادى
لكن ماحصلش ان الاخوان تواجدوا فى التحرير بهدف استغلال الناس عشان يوصلوا للسلطة
ثم ان الاخوان نفسهم طلعوا وقالوا انهم مش هايقدموا مرشح للرئاسة فى الانتخابات الرئاسية القادمة 2011!

People outside Tahrir said that the Muslim Brotherhood group were there in large numbers and they were inciting people so that they can achieve their goals and they
really want to use youth and people at Tahrir to govern!
Yes, Muslim Brotherhood were there .. and also there were Christians, opposition parties, and free thinkers. They were all at Tahrir
Many newsletter were being distributed. Health newsletters, awareness newsletters telling people that they must change themselves and be better for Egypt and that
they must know what's going on, .. etc.
but there wasn't any newsletter telling people that "Islam is the solution", or that Muslims brotherhood is better than others or numerates their good deeds!
It was their right to be at Tahrir like any other Egyptian
but It didn't happen that Muslims Brotherhood tried to use people to take power.
Then Muslims Brotherhood themselves said that they will not submit any candidate to the next presidential elections in 2011!

الناس فى مصر اصبحوا اكثر تفتحا
اكثر تقبلا للاخر

People in Egypt are now more open minded
More receptive to another

بعد 25 يناير
لو حصلت مشكلة وكان طرف فيها مسيحى .. اعتقد ماحدش هايتجرأ ويقول فتنة طائفية

After 25th January
If there is any problem and one of its parts was a Christian .. No one will dare to say that it's a sectarian strife

صورة صورتها بنفسى فى ميدان التحرير فى الاول من فبراير

يوم المليونية الاولى

فتاة مسيحية مصرية مع فتاتين مصريتين مسلمتين

تقول الصورة:

"مسلمون - مسيحيون - شباب مصر"

Photo taken by me on 1st of February at Tahrir Square

on the 1st million march day

a Christian Egyptian woman with two Egyptian Muslims

Pictures says:

"Muslims - Christians - Egyptian youth"

Mohamed Mounir - Ezzay (How come?) .. محمد منير - ازاى؟

ازاى ترضيلى حبيبتى؟

ezzay Terdeely Habebty?

How come you can accept it for me, darling?

اتمعشق ف اسمك وانتى

atmaashaa f ismek wenty

that I adore your name, and you ..

عمالة تزيدى ف حيرتى ومانتيش حاسة بطيبتى ازاى؟

ammala tzeedy f herty w mantish hassa b tebty ezzay?

keep confusing me and you can't feel my good things (goodness), how come?

مش لاقى ف عشقك دافع

mesh laa'i f esh'ek dafee

There's no reason that makes me love you

ولا صدقى ف حبك شافع

wala sed'y f hobbek shafee

and being honest in loving you doesn't help

ازاى انا رافع راسك وانتى بتحنى ف راسى ازاى؟

ezzay ana rafee rasek wenty btehny f rasy ezzay?

how come that I'm raising your head and you're keeping bending my head (humilation), how come?

انا اقدم شارع فيكى

ana aa'dam sharee feeki

I'm your oldest street

وامالك م اللى ماليكى

w amalek m elly maleeky

I'm your hopes for what fills you in (what spreads in you)

انا طفل اتعلق بيكى ف نص السكة وتوهتيه

ana tefl etaalaa' beeky f nos elsekka w tawwehteeh

I'm a child had a crush on you in the middle of the way and you made him get lost

انا لو عاشقك متخير

ana law aash'ek metkhayyar

If it was a choice for me to love you or not

كان قلبى زمانه اتغير

kan alby zamano etghayar

I would have changed from my part (means that he didn't have any choices but loving it)

وحياتك لافضل اغير فيكى لحد ما ترضى عليه

wehyatek lafdal aghayar feeky lhad ma terdy aleeh

I swear by your soul that I will alter you until you're satisfied of it (my love)

----

ازاى سايبانى بضعفى؟

ezzay saybany bdaafy?

how can you leave me so weak?

طب ليه مش واقفة ف صفى؟

tab leh mesh waa'fa f saffy?

why don't you stand with me

وانا عشت حياتى بحالها عشان ملمحش ف عينك خوف

wana eesht hayaty bhalha aashan malmahsh f einek khof

although I lived my whole life trying not to see fear in your eyes

وف بحرك ولا ف برك

we f bahrek walla f barrek

even in your sea or in your land

ازاى احميلك ضهرك؟

ezzay ahmeelek dahrek?

how can I protect your back?

وانا ضهرى ف اخر الليل دايما بيبات محنى ومكشوف

wana dahry f akhr elleil dayman beybat mahny w makshoof

while my back is curved and naked every night

انا اقدم شارع فيكى

ana aa'dam sharee feeki

I'm your oldest street

وامالك م اللى ماليكى

w amalek m elly maleeky

I'm your hopes for what fills you in (what spreads in you)

انا طفل اتعلق بيكى ف نص السكة وتوهتيه

ana tefl etaalaa' beeky f nos elsekka w tawwehteeh

I'm a child had a crush on you in the middle of the way and you made him get lost

انا لو عاشقك متخير

ana law aash'ek metkhayyar

If it was a choice for me to love you or not

كان قلبى زمانه اتغير

kan alby zamano etghayar

I would have changed from my part (means that he didn't have any choices but loving it)

وحياتك لافضل اغير فيكى لحد ما ترضى عليه

wehyatek lafdal aghayar feeky lhad ma terdy aleeh

I swear by your soul that I will alter you until you're satisfied of it (my love)