He stepped down - اتنحى

زى النهاردة - وزى دلوقتى - من شهر بالظبط
11-2-11


اتنحى الرئيس المخلوع محمد حسنى مبارك




كانت تقريبا احلى ساعة فى حياتى .. من ستة لسبعة بالليل .. 11 فبراير 2011
مهما وصفت اللى حصل فيها مش هعرف
ما بين جرى وصريخ وعياط وسجود وفاتحة وغنا وزغاريد واغانى
...كان يوم قوى جدا
يارب يكون بفايدة ف الاخر
كنت قاعد ف خيمة بتكلم مع ناس اجانب

 محبطين ومخنوقين وفاقدين الامل بعد ساعات من خطابه الاخير يوم الخميس 10-2-2011

وفجاة سمعنا صريخ وصويت جامد برة

انا حسيت بصراحة .. طلعنا جرى لبست حاجة ف رجلى وجريت بسرعة سالت راجل بيجرى ايه اللى حصل؟

ماردش .. كان بيجرى وعمال يقول "ععععععاااااااااااااااااااا"

سالت واحدة تانى .. قال "ععععععاااااااااااااااااااا"

واحد وقف وقاللى "اتنحى اتنحى!!!!"

قعدت انط واجرى ف مكانى والف حوالين نفسى وانا بصرخ

كلمت بابا بسرعة اتاكد منه

ولمنا رد عليه ف التليفون وماقالش سلام عليكم ولقيته بيقول "الف مبروك يا حبيبى"

عرفت انه فعلا

ماعرفتش اقول ايه ومسكت نفسى بالعافية وقفلت معاه

بدات اصرخ .. ولما واحد سالنى فى ايه

قلتله: "ععععععاااااااااااااااااااا"

طلعت اجرى والتحمت بالناس

قلبى كان هايقف من كتر التنطيط والصريخ والجرى

عملنا دواير وقعدنا نلف واحنا بنتنطط وحاطين ايدينا على كتاف بعض (وماحدش فينا يعرف التانى) وكل واحد بيقول اللى قار يقوله

الشعب خلاص اسقط النظام .. بلادى بلادى .. والله وعملوها الرجالة .. او اى هتاف

هو انا مش هعرف اوصف بالظبط لانى استحالة افتكر اللى حصل بالظبط ساعتها

بس كان فى صريخ كتير .. وسجود شكر كتير

وطلعت اجرى على النصب التذكارى اللى كنا عاملينه للشهداء واللى حاطين فيه صورهم ف براويز وحواليهم سور صغير

وقفت اقرالهم الفاتحة

كنت خلاص فعلا منهار

واللى يقولى خلاص من النهاردة مفيش عياط وهانضحك على طول .. واللى تزغرد .. واللى الاقيه قعد يعيط معايا

ورجالة ما استحملوش وقعدوا ف الارض وتجمعات بالالاف عمالين يقولوا كل الهتافات اللى كنا بنهتف بيها من اول يوم ف الثورة

كانت لحظة تاريخية

وبدا اغلب الناس اللى كانوا مشيوا او روحوا بيوتهم ساعتها من بعد الخطاب بداوا يرجعوا

واللى كان برة التحرير على قهوة ولا بياكل رجع

وف دقايق التحرير اتملى

اللى ماكانش موجود ف التحرير اليوم ده بالذات .. فاته كتير اوى
كتير اوى بجد

كان يوم مش عادى

كانت ساعة مش عادية

من ستة لسبعة بالليل .. 11 فبراير 2011

عمرى ما هاعيش لحظة تانية زى دى

عمرى ما هانسى التاريخ ده